Raat ki kaali naag ke bill se,
chhiney chaand taaron k moti,
badal ki ghanghor ghata se
bijli ke do taar chura ke
kii hai tere baal ki choti,
bhor gagan se li hai laali
or dono haathon me mal ke
sehlaya tere gaalon ko,
chuna hai har patjhad ka patta
Jinhe piro ke haar banaye
singara tere baalon ko,
indradhanush ke rang manga kar
sapno ki kucch kaat ke chadar
choli teri see hai humne,
li udhaar baarish ki chham chham
kuchh saanson ki gehri sargam
jod ke bandish ki hai humne,
har ik tera daur ghumakar
lamha lamha jee hai hume,
Har ik pal ko jaam banakar
ghoont zindagi pee hai humne
No comments:
Post a Comment